समंळ,
ये घडीम कांयी केळू करन,

गोर कूळी धेनेम लेन, याडी मरीयामान नवळ करन, गोर कूळीम हेन चलेगे जको वेराळू नायक नायकंळ, कारभारी कारभारंळेन हारद करतो हूवो ये घडीम जतांळू वतांळू छ क, आपळ गोर सीकवाडीर हेत ठेरान पूरो करेसारू निकळे जको सोबती छां. आपळ गोर सीकवाडी 2001 न सरू किये. पंळन वोर आंगाडी गोर कूळी धेनेम लेन काम 1995 ती सरू हेगोतो. 2001 ती सरू किदे जको काम कतराक हियो जको पडताळो घालन देकेसारू  2011 म कारीया घडान वोर आंग नाळी नाळी कारीया घडाते आज जत छां वतेतांळी पूंचेचा.

आतरा सालेम नाळी नाळी तरार नेम ठेरान कारीया घडाते गोरून जगाते छां. पळन जना 2011 र कारीयाम गोर जूडे जको देकन मन ये वातेरो डर लागरोतो क, ये ढंगेती गोर जूडते गे अन वोनून संबाळेवाळ, सोबत लेन चालेवाळ सोबती वो ढंगेती जबाबदारीती वागेवाळ बळे कोनी / जूडे कोनी तो जागरे जूडरे जे गोरून नाळी वळण लाग सकच नितो बडतो भरोसो वड सकच. यी वात घडी घडी जिलार विभागेर सोबती हूडीयांग केतो जतातो हूं. पळन दकेर वात छ क,वो वातेपर वो ढंगेती घंळे सोबती वचार करते देकते वागते छेनी. मलक मलक फरतू ळा, कयीक कारीया घडान लातू ळा सोबतीवर बोलंळू वागंळू देकन कांयी वाते लकन रकाडन येळावकतेपर केयेर कसोसी करतो छू.

कांयी गेनी धेनी केगेच क, कूळसीबी वातेर कोसा काडेर हेंळूतो लार लागन काम करते रेंळू लागच. सातोसात वो कामेसारू वचार करेम, बोलेम, वागेम, करळीम सरीकोपळो रेंळू लागच. हेत जतरा मोठो काम वतराच मोठो अन वतराच जापा दन लार लागन करते रेंळू लागच. पंळन आपळ काम कररे नितो काम करेर वाते कररे नितो काम कररे येक आणा अन आसा कररे बार आणा. यी काम कूळीर छ, घंळो कांयी बिगडबागड हेगीच, वोन सदारंळू आंग बडांळू छ. यी काम येकलेती हेयेवाळो कोनी करन सोबती जोडते रेंळू गरजेर छ. आपळेम नाळी नाळी हूनरेर घंळे मांळस छ वोनून सोबत लेन, जेरवोर हसाबेती लार लागन काम करते रे तो बिगडी घडी बेस सकच. आबच से कांयी वात हो कोनी पळन कमसकम भूलाडी पडी जे वाटेपरेन चालंळू सरू हेगोच. आपळ से वातेर समंळ घालन वाट पाडीयांतो आयेवाळ (पिढी) कूळी वो हसाबेती वागन हेत पूरो करीये अन वोर आंगेर कूळी जतन करन रकाडीये, करन हेतेसारू जगेवागेवाळ नेक सोबती बळाते रेंळू छ. दम रकाडन लार लागन हेत पूरो करेसारू जगेवाळेर गरज छ.

घंळे सोबती आदेकार गजाते दकारेच पळन आंगाडी जबाबदारी पूरो करंळू लागच यी भूल जारेच. आपळ काहा जुडेचा अन गोर सीकवाडीरो हेत कांयी छ येपर धेन देरे कोनी. कांयी सोबती होकापत वटाये जको पूरो कररे कोनी पळन गरजेर छेनी जको वातेम मातो घालते छ. गोर सीकवाडीर पसारो लेन निकळो जेरच फरेर, धुंडेर, बोलेर, वागेर, वचार करेर आदेकार खोसते छ. हानूती ठरो हूवो हेत पूरो कूं कांयी हिये ? आसी कयीक वातेर धेन देन वचार करेन लगायेसारू, नाळी नाळी ढंगेती वाते फेरफारन केतांळीन वचार करेन लगान कूळीर कामेर मन मातो बळायेसारू समंळ लकेर यी कसोसी छ. - काशिनाथ.