गोर कूळी धेनेम लेन, याडी मरीयामान धोकन, राजा भोज मिठू भूकिया सेवा नायक कतो सतगरू सेवालाल सरीक से नायकेन हारद करन आजेर घडीम पेदा ही जे घडीम कांयी वाते जतायेवतायेर कसोसी करेम आवरीच. ये वाते वांचन काळ येळ देकन समंळ घालंळू गरज वाटीतो मन सीक देंळू कतो आयेवाळे दनेम कांी वाते सदारन लकतू आये.

पूरे भारत देशेम वसमेले जको अन भारत देशेर भारबी वसमेले जको सोतान गोर अन दुसरेन कोर समजेवाळेर बोली बाणो साज संळगार रेंळसेंळ खानपान जगळू वागळू लारेर ५०-६०-७० वरसेहेटेतांळी येकच र. लोक कयीक सालेती भूलाडी पाडेर काम
कररेते पंळन भूलाडी पडी कोनी हेती अन लोक आपळेपर घाला घालरेच केन जागे हेते पंळन हाळी हाळी भूलाडी पडेरो काम बडतो गो, समंळ घालेर वचार करेर छोड़ते गे पेट भरेमच हाम गूताते गे अन गोर छां केयेवाळ लोकूर सपाटेम सपडान लोक क जूं सोतान लमाणी, लम्बाडा, बंजारा, ...केयेन अन वळक जतायेन लागगे.

नायकी करेवाळेन नाईक केते केते नाईक केरायेर वळण लगाये, दुसरीवडी सरकारी दफ्तरेम चपराशीर मुखियान चपराशीन, हाकमेर ताबेदारी करेवाळेन नाईक नाम पद रकाडेच. नायकंळेन नायकीन केते जताते रे अन मराठीम बोलीम नायकीनीर आरत धंदो करेवाळे लोकूर हेट पडेवाळे बायी मांळसेर मुखंड कतो नायकीन केन लकेच. हानूच लमाणी लम्बाडा बंजारा बाजीगर सिरकीबंद आसे नाम देन वळक बळाये अन गोरपंळो छडाये. येक वळक बोली बाणो साज रीते वाते खानपान जगळू वागंळू येक रेन SC.,ST.OBC,BC.,VJVJNT, DNT.,DTA बळाते लकते छ. हानू कना काहा कूं किदे जेर गेनी धेनीन खबर छेनी. पूरे दनियाम गोर कूळी धेनेम लेन वचार करेवाळ नितो भारत देशेम कूळी धेनेम लेन समंळ घालते वचार करते काम करेवाळ लारेर २० सालेम कती कोयी दकाये कोनी. जे कोयी मळते छ वो केरीनकेरी बळन काम करते छ, वो केनीतोबी मोठो करते, केरीतोबी हसाबेती वचार करते जगते दकावच.

हजारो वरसेती वळक टकन र जे गोरूर लारेर ७० सालेम घंळो घोळ घालेरो काम जोरेम चालतो छ अन कूळीर कोयीबी वचार करते दकारे कोनी जेती गोर वळक गोरपळो दम तोडतो आखरीर घटका मोजती दकावच. म अन मार कांयी सोबती पेनार गोर वळक बळावां, गोर नायकी करेवाळ लोकून पोसेवाळ जगायेवाळ र जको वजाळेम लांळू केन झटते छां. पंळन राज करेवाळ लोक गोर वळक खतम करेसारू लार लागन काम करते छ अन कांयी गोरून पकडन लार लगान गोर वळक खतम करेसारू जोरेम काम करते छ. जना नवी पिडीन गोर वळक करान देयेसारू यी कसोसी छ. - काशिनाथ.