Satguru Sevalaler Aardas
वाते धनेम लेंळू करन.....
नंगरीम येक फकड़ीर धोळो धजा लगांळू.
अमावस पूनमेन सतगुरु सेवालालेर नामेर अन याडी मरीयामार नामेर भोग लगाते रेंळू.
भोग लगायेसारु गोरुर हरेक घरेती १० - १० रपीया हिंसो गोळा करंळू.
भोग लगान पिसा वूरगेतो, वो पिसा जबाबदार मांळसेकन रकाडंळू. पिसार हसाब देते रेंळू, सतगरुर अन याडी मरीयामार नामेर पिसाम घोळ न घालंळू.
सतगरु सेवालालेर नामेर भोग नंगरीर नायकेर हातेती लगांळू. नायक न र जना कारभारी नितो भोग लगायेर ठकांळ वो वकतेन र जे डायेसांळे मांळसेर हातेती भोग लगांळू.
सतगुरु सेवालालेर नामेर भोग लगारे जना बायी मांळस छोरी मातेपर कोसा (पदर) कपडा लेन हात जोडन बेसंळू, माटी मांळस छोरा मातेपर कपडा लेन छातीन हात लगान हात जोडन हूबे रेंळू,कतो केरीबी मातो वगाडो न रेंळू.
यींळती आरदास होगी क हूबे ठकांळेती नवंळ करंळू.
भोग लगातूंळा हानू केयेम आवच क, 'आवो भोग लगांवा'. कतो यी भोग सेरेवडिती छ जना भोग लगायेर वकतेन नंगरीर हरेक बायी माटी छोरी छोरा आवळू. यी गोर कूळीर रीत छ, आपळ गोर कूळीर छां जना भोग लगायेन येळापर आवते जांळू, घडीघंटा बेसंळू.
