म गोर कूळी धेनेम लेन जनाती वचार करतो फरतो छू, वो घडीती नाळी नाळी घरम पंथेर काम देकतो छू, नाळी नाळी धरम पंथेर काम देकन कांयी वाते कळी. लोकूर धरमेरो काम बडतो छ. धरमेरो काम बडायेसारु लोक नाळी नाळी तराती काम करते छ. नाळी नाळी वाते वचार जोडते लोकूर मनेन जाळते, लोकून कळ जूं, भाव जूं, जम जूं,नाळी नाळी वाते रीते केते, कराते धरमेरो पंथेरो काम करते, कराते, लकते छ. जेर जको आपळ वात खर आच कामेर हीतेर केते सोतार छ केन हाक जताते छ. खर खोट आच बला वोनूर वोनून मालम पळन केते वताते जताते छ क यी वात खर छ, पक छ केन.

आपळ धेन देन दीटेतो यी वात धेनेम आवच क, लोक कांयीबी केरे, जतारे, वतारे हेळूतोबी वोरमांयी वो वोनूरो हीत देकते, हीत करन लेते छ. सोतार, कूळीर हीत धेनेम लेनच वो देव, धरम, पंथ, संप्रदायेर, वचारेर वाते करते छ. आत जेरजको से वाते, रीते, हेत ठेरानच काम करते छ. जसो क, कांयी करेरो ? कना करेरो ? कूं जगेरो ? कूळीती कूळी कूं सवायी डोडी घडायेरो ? ये अन आसी से वाते ठेरान छ. येळा वकत देकन कांयीबी केते हैंळू, सेनूरो हीत वताते केते जताते हैंळूतोबी, हीत भलो सक मान छ केन भूलाडी पाडते झुलाते रेंळू लागच जनाच लोक सोबत रच, कन आवच, आपळ बळच यी वोनूर डाव छ. आपळे कनेर बळायेर संग करनच लोकून झुलातू / रबातू / लूटतू आवच यी वात धेनेम लेन वो वो लोक काम करते कराते छ.

आपळोसदा गोर कूळीर केन से कांयी ठरोठुरायो छ. लारेर कांयी सालेती (वरसेती) भूलाडी पडती छ. लारेर काळेम बाटीन मोताज हेगेते जना बाटीमच आडकगे, आंगेरो वचारच कीदे कोनी. येर बादेम बदलते काळेर झोर बांधन जगेवागे कोनी. हाळी हाळी भूलाडी पडती गी, कूळीर जबाबदारी वटान कोयी काम कीदे कोनी. कूळीर वाते रीतेन समजन लेन समजान के जताये वताये कोनी. कूळीर वाते रीते केन, कांयी वाते जतन करते आंगेर कूळीतांळी पूंचाये, पळन हाळी हाळी वो वाते रीते समजन लीदे कोनी, वोरो आरत वतारे कोनी. जेती वो वो वाते रीतेर भूलाडी पडती गीच. आपळेन भूलाडी पडेवडिती, लोकूर भूलाडी पाडेर सपाटेम सपडाते गे अन लोकूर वाते रीतेन आपळी हीतेरी, आची, मानेरी, पुण्येरी, मोक्षेरी समजते छां.

आपळे कूळीर वाते रीते समजन लेन जबाबदारी वटान कोयी काम करते छेनी. कोयीबी कूळीरो काम करेर जबाबदारी मार छ, हमार छ केन आंग आये कोनी, जे कोयी आंग आये वो देकादेकी लिदे जोग जेती घटगी काया बडगो रोग जूं हेगो, जेती कूळीन लोकूर ताबेम झलायेरो कामच जापा हेगो जूं दकारोच. आपळो कांयी परको कांयी ? आचो बला कांयी ? खरो खोटो कांयी ? आपळे कनेर कूळ अन घळमेर कुंळ कळो कोनी. कूळीन कुंळसे वचारेर रीतेर गरज छ ? कूळीन कुंळसे वचार, रीते, वाते तार सकच ? वळक टकान रकाड सकच ? लोकूर लार लार घिसायेवाळ बळेरो, लोकूर बळन जगेवागेर क सेनूर बराबरीर छां केन जगेरो ? आपळो नाळीपळो काहा छ ? आपळे कूळीर लोक नाळीपळो टकान आपळेतांळी लान काहा पंचाये ? ये अन आसी वातेपर खल करन ठेरान कूळी घेनेम लेन काम करेन चावतो. पळन हानू कांयी हियो कोनी.

लोक आपळेन सीकारेच क आपळ से येके देवी देवेर बेटबेटा छां. आपळ से येक छां. से देव येकच छ. से कांयी वाते रीते नाळी नाळी तराती चालरी हेंळूतोबी वो से देवेर भगतीर पुण्य सक मोक्ष स्वर्ग मळायेरी वाटे छ. सेरो सार येकच छ. कोयी केरे सेवालाल फलांळेरो आवतार छ, कोयी केरे - सीकारे फलांळो अन सेवालाल येकच, कांयी केरे फलांळो सेवालालेर आवतार छ. फलांळो पंथ संप्रदाय आचो छ, यीच खरो छ. आसी कयीक वाते केंळू सीकांळू जताळू चालरोच. ये से वाते आपळेन काहा सीकारे ? नाळी नाळी देव धरम पंथ संप्रदायेर वाते काहा कररे ? दनियाम आबेताळी अन आबसदा मांळसेरो लोयी धरम पंथेसारु काहा रडो अन रडरोच ? बोल ळा केतुंळा केरे से देव येकच छ, पच हाम (म) केरो जको, हमारोच खरो आचो कामेरो हीतेरो काहा केरे जतारे? लोक जेर जको धरमेरो देवेरो पंथेरो काम काहा कररे ? लोक आपळेन आपळो काहा रेये देरे कोनी ? केरीबी काहा बळारे ? आपळ काहा लोकूलार डोरा जारे, लोकूर बळरे? येपर खल हेयेन चावतो.

आपळ जूं जूं लोकूर कन जाते गे, लोकूर सांबळते गे, लोकूर सपाटेम सपडाते गे जूं जूं लोक आपंळेन वोनूर हसाबेर बंळाते गे. आपंळे नंगरीम कुंळसोबी कूळीरो ठकाळो बळेनी जेर आंगाडी हानमानेर ठकांळ बळाये, आजी कांयी कांयी ठकाळ बंळते गे. आब आब कती कती सेवालालेर गुडी थडो देवळ दकारोच, जे कांयी सेवालालेर देवळ दकारेच वो सदा लोकूर हसाबेरच बंळन छ अन लोकूर हसाबेरच बळते छ. जती कतीबी सेवालालेर ठकाळ बळामेलेच वतेती सतगरु सेवालालेर वचारेर हेतेर काम चालरो कोनी. आपळो मन अन मातो जे कांयी वचार करतो छ, आपळ जे कांयी काम करते छां, यी गोर कूळी धेनेम लेन चालरो कोनी. काहातो आपंळ गामेवाळेरो जातेरो धरमेरो पंथेरो खेळ (चाल) जाळे कोनी. जना कांयी वाते धेनेम लान देयेसारु गोर केन खल करायेसारु आपळ कूंळ छां लकेम आयो. लोक भलायी येके गामेम रच पंळन वोनूरो धरम नाळी नाळी छ. वो परेती सरीके दकाते हैंळू पंळन वोनूर धरम,सीक, ...नाळी छ. वोरमांयीर कांयी धरमेर कमसकम वळक करान देयेम आवरोच. आपळ धेन देन गोर कूळीर छां यी वात भूलेबना वांचीयो वचार करीयो तो कांयी वाते कळीये आस आसा छ....काशीनाथ.