गोर सीकवाडीर नेम

ये घडीम केंळू करन,

सोबती भेन भायीयो, गोर कूळी धेनेम लेन, याडी मरीयामान नवळ करन, कूळीम हेन चलेगे जे वेराळू नायक नायकंळ कारभारी कारभारळ डायीसांळी डायेसांळेन हारद करन गोर सीकवाडी नामेती लार लागन 2001 ती हेत ठेरान काम सरू छ. आजेताळी
कळ जूं जम जूं नाळी नाळी तराती वचार पचारंळू चालतो छ. नाळी नाळी कारीयामांयीती जगाते जोडते हेत धेनेम लान देते छां.लारेर कमभरती 03-04 कूळीती (पिढीती) बिगडती आयी जको वात सूदो हेयेन येळ लागच पळन दम रकाडन लार लागन रेंळू गरजेर छ यी वात कोयीबी धेनेम लेरे कोनती जूं दकातो छ. कयीकेन ये तरार कामेर वळण छेनी करन वंगारो कोनती.कयीकेन सोतार येळ पिसा मेहनत मातो लगान झटेर ताकत हिमत छेनी,

गोर दनियारो नेम जांळन जगेवागेवाळ र.मूयेन मटी जीवतेन बाटी. करेबना मळेनी क कळेनी. रोयेती राज मळेनी अन धांसेती दाडो आतमेनी. आसी कयीक वाते जांळन जगेवागेवाळ गोर, बलाती बला घडीमांयीती वाट काडते आपळेताळी से कांयी वाते रीते
वचार सीक लान पूंचाये जको गोर.पंळन समीया बदलो, काळ बदलो, मलाळ मांडन वसेन लागगे, लोक सीकाये जको सीकते गोर गोरूरो से कांयी छोडते छ. समंळ घालन देकेर छोड दिने, लोकूर वाटेपरेन चालेन लागगे, लोकूर हसाबेती जगेवागेन लागगे.
मानेन पान अन कतरान थाळीभरो धान, मान बराबरी हिंसेसारू लडेवाळो गोर, नेमेती जगते वागते कूळी सवायीडोडी घडायेवाळ कूंयीबी बना हेतेर जगते छ.

आसी हालतेमांयीती 2001 ती हाळी हाळी कांयी गोर भायी देकते सांबळते भळते जूडते छ. हिंसेन आये जको काम कांयी करते छ तो कांयी फरपडते छ, कांयीन भरोसो आवरो कोनी, कांयी वादावादी करलेते छ. म काहा करूं ? फलांळो कररो कोनी, मन मान मळरो कोनी, मन कोयी गळतीम लेरे कोनी आसे कयीक तरार गरांळो चालतो छ. आपळ कांयी कररे ? काहा कररे ? कूं कररे ? आपळो हेत कांयी छ ? घंळे भायीन चळवळ मालम छेनी, कांयी सोबती क जूं सांबळन काम करते छ. पंळन कांयी जेरजको मनेती कूंयीबी वागते छ जेती घंळो कांयी घोळघाळ हेतो छ. ये से वातेर कोसा काडेसारू गोर सीकवाडीरो ठरो हूवो हेत पूरो करेसारू से सोबती येके हसाबेती वागळू अन काम येकसरीको चालेसारू चलायेसारू नेम ठेरायेम आवरोच. जापाती जापा वाते धेनेम लायेसारू से सोबतीवून लकन लायेन केयेम आयोतो सोबतच राज्य, विभाग, जिला सोबती पदाधिकारी सोबत खल करन गोर सीकवाडीर नेम ठेरान लकेम आयोच. सेच वाते येम आवगी हैंळू आसो छेनी, पळन कसोसी करेम आयीच -  काशिनाथ.