ये घडीम केळू करन

गोर कूळी घेनेम लेन, याडी मरीयामान नवळ करन, सतगुरू सेवालाल, लाखा गोर सरीक वेराळू नायक कारभारी अन हरपंळी जमंळी धरमंळी देवली सरीक वेराळू नायकल कारभारंळेन हारद करन कळायेम आवरोच. आपळे सोबतेरच घंळे सोबती ग्राम पंचायत, पंचायत समिती, जिला परिषद निवडणूक लडाये. कांयी वोम जीतन आवगे कांयी केरीसारूतोबी निवडणूकीम काम करते दकाये. घंळे सोबती, भळे जको गोर राजकारभारेरी वाते करते दकावच अन घंळे गोरून राजकारणेर गोडी दकावच.

कयोकळा नाळी नाळी मलकेर डावेसांळे बचारी गोर राजकारणेर बारेम बोलते दकावच. सोबतच हानूबी केते दकाये क, तम मेळावा, मोर्चा, उपोषण, धरणे, रस्तारोको कतरायबी करो पंळन हालत सदरेवाळ छेनी. तम भार कतरायबी आलडाये, बूंबडी मारते रे तो तमनेन कोयी गळेवाळ छेनी क तमार वातेपर कोयी थेन देयेवाळ छेनी. तम लाखो गोर गोळा करते कतरायची साल गीद गाते आलडाते रे तोबी तमनेन आपळेन कोयी गळेवाळ छेनी क आजेतांळी कोयी गळे कोनती अन आंगवी कोयी गळेवाळ छेनी. कूळीर जांळ रेयेवाळ, कूळीर तळमळ रेवाळ, कूळीसारू झटेवाळ माळस राजकारभारेम जायेबना कूळीर हीत भलो हेयेवाळो छेनी हानू कांयी गेनी धेनीबी भळन बोलते दकाये.

२००१ ती गोर सीकवाडी, बोर बादेम गोर सेना, नायकंळ कारभारळ डायोसांळीर मेळो, नायक कारभारी डासांळेर मेळो, गोर गावळियारो मेळो आसे दळ बळान कूळी धेनेम लेन नाळी नाळी नेम ठेरान गोरून गोळा करते जगाते, कूळीसारू सोतार येळ पिसा मातो मेहनत लगायेर वळण लगाते छां. दनेती दन हजारो लाखो गोर जूडते छ भळते बोलते खल करते छ जको देकन राजकारणी गोर समजन लिये आस आसार. महाराष्ट्र राज्येपुरतातोबी महाराष्ट्र राज्येम राजकारणेम काम करेवाळ, शिवसेना, भाजपा, राष्ट्रवादी कॉंग्रेस पार्टी, भारतीय राष्ट्रीय कॉंग्रेस पार्टीर गोर भळीये आस आसार. ये राजकारणी भळीये तो कूळौर हीतेर नेम ठेरान वो राजकारणेम काम करंळू अन आपळ वोनून हातभार लगान राजकीय ताकत वडांळू आसो वचार र.

आपळ जे कांयी आसा र आसो कांयीवी घडो कोनी दनेती दन बडतो काम अन दळ देकन पार्टी पक्षेम काम करेवाळ, पं. समिती सदस्य, जि. परिषद सदस्य, सभापती, अध्यक्ष, आमदार छ को अन ते को, कनायी कुंळसी पार्टीती पं. स. सदस्य, जि. प. सदस्य, आमदार, खासदार बंळेर आसा करेवाळ, पिसावाळ पदेवाळ नवकरी सारमेले जको हामनेन दसमंळ समजते वागते दकाये. कांयी पिसावाळ लोकूर झील खिचेवाळ दकाये. जापा लकंळी सोकेसा पिसावाळभळन के के हाम ये मलकेम छो, तम ये मलकेम आवो मत. ये मलकेर गोरूरी से गरजे पूरी करेसारू आयेवाळे दनेम हाम आमदार खासदार बळेवाळ छां. जना तमार गरज छेनी, येवडी हमारे मलकेम आतांळीन गोरूर मातेम घोळ घालो मत, आतेर गोर जसे छ वसे रेवेदो हाम हमार देवलांचा. आसी कांयी वाते वचारेर मांळस भळेर देकेर बादेम, आतांळी राजकारण अन गोरूर हालत देकन नेम ठेरान काम करते छां जना तम ये पुस्तकेमांगीर वचार धेन देन वांचीयो तो हमार हेत कळीये आस आसा छ. - काशिनाथ.