मंदळा...

मंदळा कतो मनेर वात वच, सोतार मनेर वात केतूवणा सोनार गवरव रेणू लागव, सोतार वातेर गवस्व करन जनाज और बादेम याडी बापेर गवस्व बढतो स्काडेर काम बेटाच करच. मार ए दनियाम जलम देताणी गोरमाटी भास्या सामळो बोलेर सीकायेर हादो याडी बाप किदे छ. कटमाळो माईती सीकतो मोठो हेताणी गोरमाटी भास्या र वाते सीकतोगो, मार बापेन लकेर छंद र करन मन हुसेती लकणी लकेर सीकाय, आतराज कोनी तो लकणीर लकेर सीकायवाळो (शिक्षक) बणाय मार याडी बाप आज भी मारसारू मनेती झुरते छ मार बाप किसन राठोड नसाबी याडी यशोदाबाई किसन राठोड येणूर समाजेमाईर कायी वाते कळी करन शिक्षक नवकरी कस्तूवणा गोरमाटी भास्या माई लकेन लागो

गोरमाटी भास्या माईर पेलो पुस्तक वचारी लकन समाजेर मुडयांग मेलो गोरमाटी भास्या लकते दमाळ प्रकाशन संस्था हादो करेर ताकद मळती मी आत घणे लोक मराठी, हिंदी, लकते छ. पणन वरले काळेम दमाळ प्रकाशने सामृती गोरमाटी भास्या माईर पुस्तकेर प्रसार प्रचार करेर मोको मळो. जनाती लकेवाळेर-वावेवाळेर संख्या बडती छ ओती कायी ठकाणेप वाचनालय चालू करन मोका मळतोगो

शासनेन गोरमाटी भास्या मान्यता मागेसारू जावळेर पत्रिका, धुंडेर पत्रिका, पंणो नकता पत्रिका घर बतावणीर पत्रिका, तेस्वीर पत्रिका, जलम दनेर कारीयार पत्रिका, वरसाबेर पत्रिका, नाळी नाळी कारीया सोबतच अंक, स्मरणीका, लकेवाळार पुस्तक, गीदर पीवसी, ओळखेर साकी, जुनी वाते यीव्यारेर, ढावलो, पुस्तक वजाळेम लान   जतन छ.ए पुस्तक शासनेन वाट लगाय सोबतज आब ए से वाते लकन छ करन बोली न रेता सायीत्येर भास्या हेगीच से लके जकोण लिखीत पुरावा मुडयांग मेलन गोरमाटी भास्यार मोल बडारेचा ओती आठवी सूचीमा समावेस हेणो छ

समाजेर भवस्व कतो दी एप्रिल गोरमाटी भास्या भवस्व दन छ. समाजेम घणे लोक काम किदे घणे लोक लके पणन संविधानेर घटनात्मक आठवी सूचीम समावेस हेणू ये हासावेती लकणी वजाळेम लायेवाको आदरणीय भीमणीपुत्र मोहन नायक बापू छ. करन भीमणीपुत्र मोहन नायक बापूर जलम दनेर निमतेती गौरमाटी भास्या भवस्व दन आपण से भळण साजरे करते छा  

गोरमाटी भास्या गवरव दन वैचारिक चळवळ आंग चालेसारू घणे लोक काम करते छ, यी पुस्तक वजाळेम लाताणी समाजेम लकेवाळ सोबती न कायी कळाण देयर आसा करतो छू कवी मोहन पवार सीगोंडा, बी सुग्रीव सायीत्यिक, कवी अमोल नायक येनूर हातभार मन मळो करन यी पुस्तक तमार मुड्यांग मेलरोछू  

गणेश करमठोट दमाळ प्रकाशन, जिवती जि.चंद्रपूर