ये घडीम कांगी केंळू करन

गोर भेन भायी,

जै गोर, जै मरीयामा, जै सेवालाल.

गोर कूळी धेनेम लेन सतगरू सेवालालेन हारद करन ये घडीम कांयी वाते केयेम आवरीच. आपळेन येकांदी काम करेर आंगाडी,व काम कांयी छ ? काम कसे तरारो छ ? काम कूं कर सकांचा ? काम कना कर सकांचा ? वो कामेवडती कांयी होंच ? वो कामेर कांयी गरज छ ? काम काहा करेरो ? कामेती होत भलो कमायी कतराक होच ? आसी कयीक वाते मालम करन लेन काम कीदेतो काम आचे तराती करतू आवच. येकांदी गामेन जायेर आंगाडी ठेरायेम आवच क,वो गामेन काहा जायेरो ? कना जायेरो ? कूं जायेरो ? सोबत केनी लेजायेरो क येकलो जायेरो ? पिसा कतराक लेंळू लागीये? खरच कतराक आये? पिसा कतराक खरचंळू लागीये ? आंसी कांयी वातेरो वचार करंळू लागच नितो जायेर कतो आचभलो आसे वचार आवचच.

आसे तराती जे वचार करन काम करच वो पडताळो घालन देकन पको वचार करन कामेन लाग जावच. जको मन लगान लार लागन कामेन लाग जावच वू वो कामेरो कोसा काडच, वो कामेती चाव जको मळावचच. येकांदी काम दी तराती करतू आवच. १. मालम रीयो तो २. मालम छेनी पळन काम करेर मनेम छ, वू पूचपाचन लार लागन समजन कर सकच. येकांदी घंळमेर गामेन जायेर हेंळूतो येकतो मालम रीयेतो सूदो सूदो चलो जावच, मालम छेनी पंळन जायेर ठेरामेलेच वो लोक सदा वोनूर ठराये ठुराये ठकांळ पूचपाचन का हेयेनी पंचच. पंळन वोन येळ मेहनत खरच जापा लाग सकच आतरी वात छ.

आ ळेन आ ळे कूळीर हालत जांळेर हेळूतो, कूळीर वचार करन काम करेर हेंळूतो. आपळे कूळीर मांळस जत रच वत जान देकळू समजन लेंळू लागो. कूळीर मांळस कत रच ? कूं रच ? कूं जगरे वागरे ? कूं कांयी खारे पीरे वोडरे पेररे ? काम धंदो / हादो कांयी कररे ? येनूर दक सक कांयी छ ? ये कूं राबरे ? येनून कूळ रबारे ? आपळ वेयीवाट कांयी छ, वू कूळसे हालतेम छ ? आपळ बोली, गोर केन वळक, लकंळी, कमायीर.... हालत कायी छ ? काहा छ ? सदारेर गरज छ तो कांयी करंळू लागो ? आसी कयीक वाते जांळन लीदेतो कांयी कळच. जनाच पच आंग काम करतू आवच. सातोसात आपंळे आगल बगल जे जे लोक मानेती सकेती सबादानेती जगरे वो लोक कांयी कररे, कूं कररे ? जांळन समजन लेंळू लागो. हरेक वातेपर खल करीया पडताळो घालन देकीयां तो कांयी वाते कळीये अन कांयी कर सकीयां.