Santa - सांटा
ये घडीम....
गोर भेन भायीयो, म हानू कांयी पुस्तक लकेवाळेर बारेम लकेवाळो गेनी धेनी छेनी पंळन गोर कूळी धेनेम लेन हंस दकायी जे गोरून वजाळेम लातो रूंच. नवाडो सांठा तोडेवाळो, कम सीकोसाको गोर पुस्तक लकोच, वोन कूळी धेनेम लान कामेन लगातो वजाळेम लांळू करन लकोचू. कोयी गेनी धेनी येन नाम रकाडीये,खोडे काडीये पंळन कूळीती कूळी कूळी धेनेम लेन काम करेवाळेम जोर जोस भरेर म मार जबाबदारी लेमेलोचूं करन कसोसी चालरीच. विनोद लारेर २-३ सालेती भळतो अन मोबाईलेपरभी बोलतो छ. गोर सीकवाडीर नाळी नाळी कारीयाम मळाभेटेन आवतो जतरावतरा जबाबदारी पूरो करतो र. मन भळेनी जेर आंगाडी येकवंळा मोबाईलेपर बोलन मन भळेन नांदेड आयेर छ को अन म जत नवकरी करूचूं वत एस. टी.वर्कशॉपेम आयो अन बोलबालन मोबाईलेम सेल्फी फोटो काढन लेगो. हानूच येकवळा म हैद्राबादेन वचार पचारेन जारो जको खबर लागगी करन सासीच यी मेकॅनिक मांळस परमलकेम जावच कांयी अन वतेर मोठे मोठे लोकून बोलच कूं ? रच कूं ? वत जान करच कांयी देकेन आयोतो कच हानू होटो आवतूवंळा को. हानू २-३ वेळा सोबतेम आयो,जातू आतू कयीक वाते पूचतो बोलतो समजन लेतो वोर साक काडन लेतो रियो. घडी घडी कांयी वाते केतो मोबाईलेपर बोलतो र. जना मन कळो क यी सांठा तोडेवाळो मांळस छ...
