नायक काशिनाथ..

गोर एक प्राचिन विचार धारा छ. प्राचिन कतो पेनार..पेनार जमानेम गोरुर एक स्वयंत्र 'लिपी' व्हेतीती. वोन नंगरी लिपी केयेम आतीती.गोर पेनार जमानेम वो 'लिपी' वापर करतेते. वोर नुसार लकते वाचते बोलते जगते वागतेते. सिंधू नगरीर पतन व्हेयेरे बाद, (बाळे,बळगी, वेन चलीगी) गोर जंगलेम चलेगे. वोरो फायदो आतेर कलम कसायी लोक वो नंगरी लिपिम थोडासेक बदल करन ओर आंग 'देव' शब्द लगान गोर लिपीन 'देव नागरी लिपी' करनाके. जेन सिके साके गोरमाटी न जाळे न छांळे जसं छ वसचं स्विकार लिदे.गोर केळावट केगे,जे दकारोच वोरे लार कायी जपरोच जको धुंडते रीजो" आपळ सिके साके गोर जे दकारोच वोनंच खरो समजन् स्विकार लिदे. मान लिं.. करन सिके साके शहरेम रेयेवाळ गोर अन तांडे पेडेती रेयेवाळ गोरूम ताळमेळ दकारो कोणी.? शाळा शिकन साक्षर बळन शहरेम वास्तव्य करेवाळ घंळे सारी गोर गोरूरी वाते कोरून केन, शिकान कोरून गोर बळायेर छोडन, कोरूर धर्म, पंथेम सपडान, कोर विचार धारा स्विकारन, कोर विचारधारा आदर्श छ केन सोताच कोर बळगे, आज शहरे मायीर घंळे सारी लके शिके नौकरी करेवाळ गोरमाटी न तो वो गोर रेंगे. न कोरीकोर केरारे, वो र गळती जांगडेम व्हेरीच.(जांगड कतो न गोरूर न कोरूरो मालम रेयेवाळो.)

तांडेम (खेडा-पाडाती) रयेवाळो गोर आज भी गोर धाटी वहिवाट टकान आदर्श जीवळ जगतो वागतो छ. तांडेम आज भी मान सन्मान जीवतो छ. तांडेम आज भी याडीन 'याडी' अन बापेन 'बाप' च केरेच. पंळ शहरेमयीर घंळे सारी गोरमाटी कोरूर सपाटेम सपडान याडीन 'मम्मी' अन बापेन 'डॅडी' केते केराते,बना मानेपानेर जगते वागते दकारेते.गोर केन दकारो जे वागमेप समळ घालेन गोरमाटीन वेळच कोनी व्हेतीती. गोरमाटी नाळी नाळी जात, धर्म, पंथेम सपडायेर कार ती, संतसंग, प्रवचन सामळेसारू कोयी चर्च तो कोयी गुरुद्वाराम जान म कोरीकोरेर कतरा कनेर छु यी दकाळेर जसो होड लागरीती.! स्पर्धा लागरीती.! कोयी गोरमाटी होशेम कोनी व्हेतोतो.? नाळी नाळी धर्म पंथेम जाये, लेजायेर एक चढावोड चालरीती. एकेर जोडा एकेर पगेम कोनी रेगेते.? गोर केरेते केरारेते पंळ, शहरेम रेयेवाळ अन वो र आपसेमायीर घंळे सारी गोरमाटी अक्षरश: जांगड बळगेतें. वो न गोरमाटी घरेर बाटी छोडो पाळी कोनी जमतोतो. मा-बाप, भेन-भायी च कोनी चाल..वोत समधी सगासेंळ कुंळ कतेर.. आस परिस्थिती निर्मान व्हेगीती...