Swachhandi Bharari (स्वच्छंदी भरारी)
बंजारा गोरमाटीर, साहित्य परंपरा खूप मोठं छ. आपणी सोतार लिपी कोनी वेती करन ई गोरमाटी भाषा दुसरे लोकून कळी कोनी. करन गोरजीवन तत्वज्ञान, संघर्ष, गोरमाटीर जगणू कोई नेम लिदेज कोनी... आपणेन कोई वळखतेते कोनी, आपणेती कोई बोलतेते कोनी, आपण बोला गोरमाटीम, तो सारी हासते आपण जगणो, कोईच समजन लेतेते कोनी, ओनूर भाषाम संघर्ष आपणोलकतेते कोनी .. पण, आज समीया बदलगो आपणो दुख आपणीच, लकणीम मांडेरछ...' येर करता एक समृद्ध, मजबूत साहित्य चळवळ निर्माण व्हेणू गरजेर छ.. जे चळवळेर दोरा, गोरमाटीर विकासेर कळकळेर व्हेणू ई आज तांडेर गरज छ... तांडेम परिवर्तनेर जोर छ, विज्ञानवादी नंगारार घोर छ. तरी जगेर चालतीम तांडो घणो लार छ. ई तांडेर दुख छ... आपणे खूप लेखक, विचारवंत, गोरमाटी भाषार समृद्धीकरता बंजारा साहित्यिक झटरे छ... कार्यकर्ता आंग बढरे छं. गोरमाटी भाषान ' केसुलनांई मोराये' करता सारी हेन सोबत काम करा. स्वच्छंदी भरारी ईदवाळी अंक गोरमाटी भाषार मार पेलो प्रयत्न छ. येन आपणे शब्देर ज्योतेशी वजाळो देयेवाळे सारीर धन्यवाद.
