ये घडीम केंळू करन,...

गोर कूळी धेनेम लेन, याडी मरीयामान नवळ करन, सतगरू सेवालाल, देमा गरू, लाखा नायक, मिठू भूकिया, गोरा,बादल, राजा भोज सरीक नायकडान अन झलकारी जमंळी हरपळी धरमंळी देवली नायकंळेवून हारद करेम आवरोच. गोर सीकवाडी नामेती कूळीर काम सरू किये जना हानू विरादो र क,लकंळी सीकन नवकरी हादो करते तालुका जिलाम वसमेले जे भेन भायीन गोर कूळी धेनेम लेन कांयी वाते वचार पंचाळू आपळो हेत जतांळू. ये तालुका जिलार ठकांळ वसरे जे गोरूवडिती रेगे जे गोरूतांळी गोर सीकवाडीर हेत पूंचाळू, गोरून जगाळू, वचारेर लेंळीदेंळी करन गोरपळो जगाळू अन से भळन लडन हक आदेकार हिंसो बराबरी मळाळू,

आबेताळी ठेरान लार लागन डायेसांळे वचारी नायक कारभारी अन याडी भेनेपर धेन देन काम किदे कोनी. पळन जतवतेर कारीयाम नेम पूरो करतू ळा आंग हेन जापा उमरेर डायेसांळे माटी मांळस अन बायी मांळस आवते गे अन आबबी आवते छ. घडी घडी भळते वचार पचारते नाळी नाळी कारीया घडाते रेयेती वचार हेत सांबळन समजन लेन डायीसांळी याडी भेने आंग हेन भळन केयेन लागगी क, गोर सीकवाडीम हाम काम कर सकाचा कांयी ? हाम तमार गंळतीम छां क कोनी ? हाम कूळीर कूळसी कामेम हातभार लगा सकाचां कांयी ? हमार हसाबेर कूळसी काम छ कांयी ? आसी कांयी वाते सांबळन, आपळे परेर बडतो भरोसो देकन, याडी भेनेर कूळीर कामेर हूंस देकन,कूळीर गरज धेनेम लेन "नायकंळ कारभारळ डायीसांळीर मेळो" बळायेम आयो. आसेच तराती मलक मलक फरते वचार पचारते फरे जना अन नाळी नाळी कारीया देकन कांयी डायेसांळे बचारी नायक कारभारी भळन के क हाम ये उमरेम कूळीर कांयी काम कर सकाचा कांयी ? हमार हसाबेर आजेर घडीम कूळीर कूळसी काम छ कांयी ? आसी कांयी वाते सांबळन कूळीर कामेर गरज धेनेम लेन "नायक कारभारी डायेसांळेर मेळो” नामेरो दळ बळायेम आयो.

दनियाम बायी मांळस आदे अन माटी मांळस आदे छ. बायी माटी भळनच दनिया देश राज्य जिला तालुका गाम नंगरी घर चलाते छ.यी आदो हिंसो बगल रकाडन गोर सीकवाडीर हेत पूरो हेयेवाळो छेनी, यी वात धेनेम आयी.येरसारू घंळो येला करते काम करंळू लागो कोनी तो वो आंग हेन याडी भेने सोबत भळन काम करेन आवरीच. येरो आरत कूळीर कामेर हूंस अन गरज येनूर धेनेम आवती छ, कूळीर कामेर धमक छ, पळन आजेताळी मोको मळो कोनी. सातोसात आदे माटी मांळसेमांयीती आदे डायेसांळे नायक कारभारी वचारी छ. येनून लारेर दनेम भूलाडी पडगीती पंळन आब ये सोबत भळन रेंगे जे दनेम कूळीर काम करन कूळीती नेकी यिमानदारी जतावां केरेच. नेकीती लार लागन काम करते रेयेवडिती ये वाते घडती छ अन ये वाते कूळीर घंळ हितेर दकारीच. यी घडी देकन घंळो आचो लागरोच अन कूळीर कामेर सबादान मळतो छ. ये दोयी दळेर बारेम कांयी वचार छ,ये कायी वाते कर सकच कळायेसारू यी कसोसी. जे गोर जै मरीयामा जे सेवालाल.