ये घडीम कांयी वाते केंळू करन

गोर भेन भायीयो, जै गोर जै सेवालाल.

गोर कूळीन हारद करन लकेम आवरोच क,लारेर कांयी वरसेती नाळी नाळी चळवळीम काम करतूळा, नवकरीर ठकांळेर संगटनार काम करतूळा, कयीक संगटनार लोकूती खल करेन मळो अन लोकूर काम नाम बडतो देकन वाटतो र क, आपको गोर कूळीरो वचार करेवाळो काम रेयी चाय. कूळीरो नाम अन काम बडी चाय, पंळन कतीबी गोर कूळी वचार करन, हरेक तराती गोर केसूलानांयी मोरायेरो कूळीसारु करेम आवरो जको काम कती दकायो कोनी.

आत तो हरेक जाते धरमेर लोकूरो जेरेवोरेसारु काम जोरेम चालतो छ. आत हरकोयी हाक आदेकारेर वेर रमते (लडायी लडते) छ.आजेर वेर रमंळू लकडी भाटा तलवार बंदूकेती छेनी तो वचारेरो छ. आत से वचारेर वेर चालतो छ. वचारेर वेर कळेसारु समंळ घालंळू लागच, वचार करंळू लागच. पंळन आपळ गोर वचार करेरबजा लोकूर देकादेकी करते वागते बोलते छां. कूळस वात काहा घडरी ? कूळ घडारो ? काहा घडारो ? वोती कांयी हेरो ? केती केरो हीत हेरो ? दकारी - हेरी जे वातेती कामेती कांयी हेरो हेतो छ ? वू कत कामेरो छ ? केरे हीतेरो छ ? आसो कांयी वचार करन काम करते कोयी छेनी.

गोरुर हालत कांयी छ ? काहा छ ? समजन लेन काम करेम आवरो कोनी. आपळेम कयीक तरार गोर बळते छ. जसो क, पिसावाळ - गरीबिया - आश्रमशाळावाळ - खेतारीवाळ - मोलमजूरी करेवाळ - नवकरीवाळ -सांठा तोडेवाळ - मळ वत मळ जको काम करते जगेवाळ - कामधंदावाळ - पीरेवाळ एकादसेवाळ - माळेवाळ - स्वाध्यायी - ओमशांतीवाळ - हरी ओमेवाळ - निरंकारीवाळ - रामसंळी - सतसंगी - लोकूर झील खींचेवाळ - भजन बोलेवाळ - लकंळीवाळ - बोटी माचळी खायेवाळ - बना बोटी माचळी खायेवाळ - हालालेवाळ  - झटकावाळ -- कोयी नेता कार्यकर्तार बळन फरेवाळ - राजकारळेवाळ - नाळी नाळी पार्टी संगटनार आसे कयीक तरार गोर बळते छां अन बळगेचा.आपळ ....छां, फलांळेर फलांळे छां केते छां, आपंळेन गोर कूळीर छां जेर भूलाडी पडगीच, पंळन लोकून मालम छ अन वोनूर मातेम छ क, ये लमाणी लम्बाडा ...छ, बना मानेपानेर बना आदारेर लोकूलार डोरावू - हिंसावू छ.गोरूरो से कांयी सोतारो हाकेरो रेन जतन करतू आयो कोनी, सोतार कूळीर आलोलकी आपळोपंळो छेनी तो आपळो (वोनूरो) कतराक दन जतन करेवाळ छ केन वो आपळे पर भरोसो करेनी पळन जतरा दन रबातू वगातू आये वतरा दन रबाते वगाते छ.